Hægri Fyrireikingarpróvtøka
Upptøka
Fyri at verða tikin inn á HF-útbúgvingina skalt tú hava lokið víðkaðu fráfaringarroynd fólkaskúlans í føroyskum og donskum, og fráfaringarroynd fólkaskúlans í støddfrøði og enskum. Rektarin/skeiðsleiðarin kann tó í serligum førum gera frávik frá hesum ásetingum, um hann metir, at umsøkjarin hevur serligar persónligar og fakligar fortreytir. Harumframt skalt tú hava fylt 18 ár í seinasta lagi 31. desember í tí árinum, tú byrjar undirvísingina á HF-skeiðnum.
Umsókn um upptøku á HF-útbúgvingina fer fram í tí samskipaðu innskrivingini. Umsóknarblað um upp-tøku skal vera HF-skeiðnum, sum tú søkir inn á, í hendi í seinasta lagi 15. mars. Umsøkjarar verða kallaðir inn til samtalu av tí skúlanum, teir hava søkt inn á.
Undirvísingin fer fram á Studentaskúlanum og HF-skeiðnum í Eysturoy, sum eisini hevur eina HF-deild í Klaksvík, og á Føroya Studentaskúla og HF-skeiði.
Næmingar, sum ganga á Studentaskúlanum og HF-skeiðnum í Eysturoy, kunnu søkja um upptøku á Næmingaheimið á Kambsdali. Næmingar, sum ganga á Føroya Studentaskúla og HF-skeiði, kunnu søkja um upptøku á Búdeild Studentaskúlans og á Studentaskúlaheimið í Berjabrekku.
Innihald
HF-útbúgvingin er serliga ætlað tilkomnum fólki, sum hava hug at fáa sær eina útbúgving, ið gevur teimum møguleika at sleppa inn á framhaldsútbúgvingar.
Útbúgvingin tekur 2 ár, og av hesari orsøk er støðið í fleiri av lærugreinunum ikki tað sama sum í útbúgvingum, ið taka 3 ár. Hetta kann hava við sær, at ein, ið hevur HF-prógv, og sum ætlar sær inn á ávísar hægri framhaldsútbúgvingar, kanska seinni noyðist at taka eina ella fleiri lærugreinir á hægri stigi. Hetta er tó treytað av teimum upptøkukrøvunum, sum tann einstaki hægri útbúgvingarstovnurin setir.
Lærugreinir
Lærugreinirnar á HF-útbúgvingini eru býttar í felagslærugreinir og vallærugreinir. Allir næmingar í eini 2 ára skeiðsgongd skulu fylgja undirvísingini í felagslærugreinunum, meðan einstaki næmingurin sjálv/ur velur vallærugreinirnar. Summar lærugreinir eru bert til sum felagslærugreinir, aðrar lærugreinir eru ein víðkan av felagslærugreinunum, meðan aðrar einans eru til sum vallærugreinir.
Allar lærugreinir í HF-útbúgvingini eru flokkaðar í C-, B- og A-stig, har A-stig er hægsta stigið í lærugreinini. Allar lærugreinir eru tó ikki til á øllum stigum.
Til eitt samlað HF-prógv krevst, at tú hevur tikið allar felagslærugreinir, 2 vallærugreinir umframt skrivað høvuðsuppgávu.
Áðrenn tú byrjar undirvísingina í 1. HF, skalt tú velja 2 av hesum 3 vallærugreinum á felagslærugreinastigi: alisfrøðievnafrøði, lívfrøði ella samfelagsfrøði. Harumframt skalt tú eisini velja eitt 2. fremmandamál.
Hevur tú frammanundan fingið undirvísing í týskum í 2 ár, kanst tú fyrra árið velja týskt sum framhaldsmál á C-stigi, við møguleika fyri at halda fram seinna árið á B-stigi, ella tú kanst velja millum hesi 3 málini á C-stigi, franskt, russiskt ella spanskt, bæði árini.
Árliga pultstímatalið í teimum ymsu lærugreinunum á 2 ára HF-skeiði er sum tilskilað niðanfyri. Lærugreinirnar eru skipaðar í bókstavaraði.
Vallærugreinir
Til eitt samlað HF-prógv skalt tú hava 2 vallærugreinir á vallærugreinastigi umframt tær kravdu lærugreinirnar. Valbólkar verða skipaðir í teimum einstøku vallærugreinunum, um nóg nógvir næmingar velja lærugreinirnar. HF-skeiðið roynir so vítt gjørligt at ganga ynskjunum hjá næmingunum á møti. Ein vallærugrein hevur 140 pultstímar um árið, tó hevur støddfrøði sum vallærugrein 175 pultstímar. Vallærugreinirnar í HF-skipanini eru hesar: Alisfrøði, evnafrøði, evning, filmur og sjónvarp, fiskivinna, fornaldarfrøði, heimspeki, ítróttur, leiklist, lívfrøði, samfelagsfrøði, sálarfrøði, stjørnufrøði, støddfrøði, teldufrøði, tónleikur, tøkni og vinnulívsbúskapur.
Høvuðsuppgávan
Seinna árið skalt tú í einari viku, har undirvísingin verður niðurløgd, skriva eina sjálvstøðuga uppgávu, høvuðsuppgávuna. Uppgávan kann skrivast í einari lærugrein, sum tú verður undirvíst/ur í 2. HF, ella sum tú hevur fingið undirvísing í. Evnið, sum tú skalt viðgera, velur tú sjálv/ur innan eitt fakøki í einari lærugrein, men tað skal góðtakast av faklæraranum. Fyri høvuðsuppgávuna fært tú eitt próvtal, sum telur við í tí samlaða próvtøkuúrslitinum til HF-próvtøkuna.
Eftirmeting, próvtøka v.m.
Sum HF-næmingur skalt tú til próvtøku í øllum lærugreinum. Í útbúgvingini fært tú ikki støðumet ella ársmet, men 2 ferðir um árið fært tú tilboð um eftirmeting av fakligu støðuni hjá tær í øllum lærugreinunum.
Stakgreinalestur og sjálvlestur
Fyri at verða tikin upp sum stakgreinalesandi skalt tú lúka tær fakligu fortreytirnar í lærugreinunum, sum tú innskrivar teg til. Innskrivingin fer fram á einum serligum oyðiblaði, ið fæst á HF-skeiðunum.Tú skalt venda tær til tað HF-skeiðið, har tú ynskir at fylgja undirvísingini og tosa við lestrarvegleiðara um upptøku. Stakgreinalesandi verða tikin upp, í tann mun pláss er á skeiðunum. Seinasta freist at innskriva seg sum stakgreinalesandi er 25. juni í tí ári, tú ynskir at byrja undirvísingina.
Tað ber til sum sjálvlesandi at fyrireika seg til HF-próvtøku ella til próvtøku á studentaskúlastigi. Í hesum føri skalt tú tosa við lestrarvegleiðara á skúlanum, har tú ætlar at fara til próvtøku, m.a. fyri at verða kunnað/ur um tað fakliga innihaldið í lærugreinunum, pensumkrøv og próvtøkukrøv. Í lærugreinunum alisfrøði, alisfrøði- evnafrøði, evnafrøði, ítrótti og lívfrøði skalt tú hava fylgt starvsstovuskeiðunum í lærugreinini, sum tú ætlar tær til próvtøku í. Innskriving til próvtøku sum sjálvlesandi fer fram í seinasta lagi 25. februar á serligum oyðublaði. Lýst verður fyrst í februar mánaði í bløðunum viðvíkjandi innskrivingarfreist.
Framhaldsútbúgvingar
Við HF-prógvi ber til at søkja inn á allar hægri framhaldsútbúgvingar, tó við teimum avmarkingunum, sum útbúgvingarnar seta, millum annað viðvíkjandi samanseting av lærugreinum og á hvørjum stigi. Av hesari orsøk er tað neyðugt at kanna upptøkukrøvini á tí framhaldsútbúgving, sum tú ætlar tær inn á. Lestrarvegleiðarin kann hjálpa tær hesum viðvíkjandi.
Hevur tú ikki valt tær vallærugreinirnar, sum framhaldsútbúgvingin krevur fyri at verða tikin upp, ber til seinni at taka hesar lærugreinir sum ískoytislærugreinir, soleiðis at tú lýkur upptøkutreytirnar.
|
