Innihald
Skeiðið á sjóvinnuskúla tekur 5 mánaðir og fer fram á Klaksvíkar Sjómansskúla. Í útbúgvingartíðini búgva næmingarnir á einum staði, sum er knýttur at skúlanum.
Sjóvinnuskúlin gevur næmingunum eina grundleggjandi verkliga og ástøðiliga vitan um viðurskifti á sjónum og umborð á skipi.
Undirvísingin leggur dent á at geva næmingunum vitan um trygd á sjón­um, arbeiðsumhvørvi, viðlíkahald og verkligan sjómansskap, soleiðis at teir eftir lokið skeið kunnu mynstra sum dekkarar.
Skeiðið á skúlanum er sostatt fyrsta stig á vegnum, um tú seinni ætlar tær til skips. Í framtíðini verður tað kravt sambært altjóða reglum, IMO-reglum (International Maritime Organisation), at tann, ið ætlar sær til skips, skal hava lokið grund­skeið innan sjóvinnuútbúgving, áðr­enn hann/hon mynstrar.
Fyri at verða tikin inn á skipsføraraútbúgvingina skalt tú umframt at hava tikið sjóvinnuútbúgving hava siglt 9 mánaðir við skipi yvir 200 tons. Um tú ikki hevur sjó­vinnu­út­búgv­ing (grundskeið), skalt tú í løtuni hava siglt 18 mánaðir við skipi yvir 200 tons fyri at verða tikin inn á skipsføraraútbúgvingina.